Ohin Autoridade Saúde Relata Tán Kazu Covid-19 Foun Na’in-13

Dili, 18 Marsu 2021 – Autoridade Saúde relata katak deteta tán kazu pozitivu Covid-19 na’in-13, ne’ebé kompostu hosi mane na’in-9 no feto na’in haat-4.

Hosi pasiente Covid-19 foun na’in-13 ne’e, na’in-12 deteta iha munisípiu Dili no na’in-1 iha munisípiu Vikeke. 

Pasiente foun na’in-13 ne’e, Ofisiál Sentru Integradu Jestaun Krize Rui Maria de Araújo informa ohin (18/3) iha CCD, Dili, katak “idade mak entre 11-12 iha ema na’in-2 no idade entre 18-50 iha na’in-11, sintomátiku na’in-3 no asintomátiku ka la hatudu sintoma Covid-19 na’in-10”.

Rui esplika, kazu foun na’in-12 iha Dili ne’e kompostu hosi na’in-2 iha suku Komoro, na’in-6 iha suku Bairu-Pité, na’in-1 iha suku Bebonuk, na’in-2 iha suku Motael, no na’in-1 iha suku Bekora. Nune’e kazu ne’ebé deteta iha Dili sa’e ba na’in-95 dezde 07 Marsu liubá, no iha Vikeke sa’e ba na’in-3 ona.

Iha mós pasiente rekuperadu foun na’in-1 ne’ebé Rui relata ohin, nune’e pasiente Covid-19 ne’ebé baixa hela iha Timor-Leste oras ne’e sa’e ba na’in-119.

Fonte: Mídia Palácio das Cinzas

Notísia Hotu-Hotu >