Ajénsia Europeia Verifika Ona Katak Vasina AstraZeneca ‘Seguru No Efetivu’

Dili, 22 Marsu 2021 – Ajénsia Medikamentu Europeia (sigla inglés EMA) halo ona revizaun ba vasina ne’ebé prodúz hosi empreza farmaséutika AstraZeneca, no mai ho konkluzaun katak vasina refere seguru no efetivu tanba la asosiadu ka la hamosu risku ba konjelamentu raan, haktuir BBC News ohin (22/3).

EMA halo revizaun ne’e relasiona ho kazu konjelamentu raan ne’ebé mosu foin daudauk ne’e hodi halo nasaun balu iha Europa ta’uk no suspende tiha aplikasaun vasina AstraZeneca, tanba kazu refere akontese hafoin pasiente simu tiha injesaun ho vasina AstraZeneca.

“Ida ne’e vasina seguru no efetivu,” dehan Diretór Ezekutivu EMA, Emer Cooke.

Enkuantu atu kontinua hikas aplikasaun AstraZeneca iha nasaun sira ne’ebé suspende tiha ne’e depende ba ida-idak nia Estadu atu deside katak wainhira mak re-inisia fali vasinasaun uza vasina AstraZeneca.

Organizasaun Mundiál ba Saúde (OMS) mós nafatin husu ba nasaun sira ne’ebé sosa vasina AstraZeneca atu kontinua aplika ka uza tanba halo ona revizaun.

Iha Reinu Unidu, Primeiru-Ministru Boris Johnson simu ona injesaun ho doze dahuluk vasina AstraZeneca iha sábadu (20/3) liubá, no nia enkoraja ema hotu atu tenke simu vasina hodi prevene-an hosi Covid-19.

Fonte: BBC News

Notísia Hotu-Hotu >