Covid-19: Rejista Tán Kazu Foun 20 Iha Dili No 1 Iha Baukau

Dili, 24 Marsu 2021 – Autoridade Saúde relata katak ohin (24/3) Timor-Leste rejista tán kazu Covid-19 foun hamutuk na’in-21 ne’ebé kompostu hosi 20 deteta iha munisípiu Dili no ida (1) deteta iha munisípiu Baukau.

“Kazu foun 21 ne’e iha mane na’in-11, feto na’in-10, sintomátiku haat (4) no asintomátiku 17,” esplika Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo, ohin (24/3) iha CCD, Dili.

Kazu 20 ne’ebé deteta iha Dili ne’e kompostu fali hosi tolu (3) iha aldeia Bidau Mota-Klaran suku Bidau Santana, hitu (7) iha aldeia 20 de Setembro suku Bebonuk, haat (4) iha aldeia Sagrada Familia suku Bidaun Santana, rua (2) iha aldeia Bekusi Sentru suku Bekora, ida (1) iha kuarententa Otél Ramelau, ida (1) iha aldeia 30 de Agosto suku Komoro, ida (1) iha aldeia Metin I suku Komoro, no ida (1) iha aldeia 02 suku Fatuhada.

Iha mós pasiente rekuperadu foun ida (1) ne’ebé Rui relata, nune’e pasiente Covid-19 ne’ebé oras ne’e baixa hela iha Timor-Leste sa’e ba na’in-247.

Fonte: Mídia Palácio das Cinzas

Notísia Hotu-Hotu >