Polísia Husu Motorista Sira Lori Nafatin Karta Kondusaun Durante Serka Sanitária

Dili, 26 Marsu 2021 – Polísia Tránzitu husu ba motorista sira katak durante implementasaun serka sanitária ne’e tenke nafatin lori karta kondusaun inklui mós dokumentu transporte nian wainhira halo movimentu ho transporte, tanba Polísia Tránzitu kontinua halo operasaun pasa revista ba movimentu iha tempu loron no kalan, hodi identifika motorista ne’ebé laiha karta kondusaun ka transporte nia dokumentu laiha, no asegura mós regra serka sanitária.

“Ha’u hakarak informa mós ba públiku atu bele hatene katak, iha dadus asidente tráfegu hosi fulan Fevereiru nian mai ne’e hamutuk ona 130 no iha pursentu 60 mak laiha karta kondusaun. Nune’e ita atu hateten katak, asidente ne’ebé akontese maioria kauza hosi ema sira ne’ebé mak karta kondusaun laiha. Tanba ne’e mak Komandu deside operasaun pasa revista ne’e kontinua la’o hodi identifika motorista sira ne’ebé mak uza transporte tenke iha karta kondusaun”, Komandante Polísia Tránzitu Nasionál Superintendente Polísia João Belo esplika.

Tanba ida ne’e mak, nia dehan katak motorista sira tenke lori karta kondusaun ho transporte nia dokumentu wainhira halo viájen.

Enkuantu iha kinta (25/3) kalan Polísia Tránzitu pasa revista no halo ona aprensaun ba transporte lubuk ida ne’ebé maioria laiha dokumentu pesoál hosi motorista no dokumentu viatura.

Fonte: Mídia Polícia Nacional de Timor-Leste (PNTL)

Notísia Hotu-Hotu >