SEJD Enkontru Urjente Ho Líder Organizasaun 77 No Kera Sakti

Dili, 26 Marsu 2021 – Relasiona ho konfrontu ne’ebé akontese foin lalais ne’e iha kapitál Dili, nune’e, ohin (26/3) Sekretáriu Estadu Juventude no Desportu Abrão Saldanha hala’o enkontru urjente ho líder organizasaun Arte-Rituál 77 no Arte-Marsiál Kera Sakti, ho objetivu atu rona informasaun hosi organizasaun rua ne’e kona-ba konfrontu ne’ebé akontese no buka nia solusaun.

“Ohin parte SEJD bolu lideransa entre Kera Sakti no Arte Rituál 77 sira mai iha ne’e atu buka solusaun, tanba ha’u preokupa liu kona-ba konfrontu ida ne’ebé akontese tiha ona iha loron hirak liubá, liuliu iha tempu pandemia Covid-19 nia laran […]. Sira rasik dehan la autoriza no la orienta sira-nia organizasaun atu halo konflitu,” dehan SEJD Abrão ohin hafoin remata enkontru iha edifísiu SEJD Lecidere, Dili.

Enkuantu hosi parte 77 nian, Metre 77 Abilio Soares hateten, parte responsável la hatene kazu ne’ebé akontese foin lalais ne’e iha kapitál Dili, no nia konsidera kazu ne’e nu’udar responsabilidade individuál, maibé nia mós apela ba membru 77 sira atu hakribi violénsia no diskriminasaun.

Hosi parte Kera Sakti nian, Prezidente Kera Sakti Timor-Leste Silvester Xavier Sufa hateten, organizasaun la fó autorizasaun atu nia membru sira halo violénsia. Silvester mós husu membru sira atu kontribui páz ho hakmatek tanba Timor-Leste enfrenta hela pandemia Covid-19.

Fonte: Mídia Secretário Estado Juventude e Desporto (SEJD)

Notísia Hotu-Hotu >