Covid-19: Deteta Tán Pozitivu Foun Na’in-58 Iha Timor-Leste

Dili, 26 Marsu 2021 – Autoridade Saúde Timor-Leste informa katak rejista tán kazu pozitivu Covid-19 foun na’in-58, mane 27 no feto 31, ne’ebé kompostu hosi na’in-54 deteta iha munisípiu Dili no na’in-4 iha munisípiu Baukau.

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria deAraújo informa ohin (26/3) liuhosi vídiu konferénsia katak, kazu foun 54 iha Dili ne’e kompostu hosi ida (1) deteta iha aldeia Funu Hotu (Kulu-hún), ida (1) iha aldeia Ai-mutin (Komoro), ida (1) iha aldeia Betó Oeste (Madohi), ida (1) iha aldeia 05 (Fatuhada), ida (1) iha aldeia Toko Baru 2 (Kulu-hún), ida (1) iha aldeia Bidau Manumata (Bidau Santana), ida (1) iha aldeia Fomentu II (Komoro), rua (2) iha aldeia 02 (Fatuhada), rua (2) iha aldeia Lemkari (Manleuana), hitu (7) iha aldeia 30 de Agosto (Komoro), hitu (7) iha aldeia Maukoko Mate (Bekora), sanulu resin ida (11) iha aldeia Metin-hún (Bebonuk), neen (6) iha aldeia Rosário (Komoro), haat (4) iha aldeia Mura (Santa Krúz), no ualu (8) deteta iha kuarentena lubuk ida iha Dili laran.

Ho ida ne’e munisípiu Dili rejista ona kazu hamutuk na’in-292 dezde deteta iha BTN II iha loron 07 fulan Marsu liubá.

Iha mós pasiente Covid-19 rekuperadu foun na’in-17, tanba ne’e totál jerál pasiente infektadu ne’ebé oras ne’e baixa hela iha Timor-Leste sa’e ba na’in-298.

Fonte: Timor News

Notísia Hotu-Hotu >