Xefe Forsa Defeza Hosi Nasaun 12 Husu Militár Myanmar Hapara Violénsia

Dili, 29 Marsu 2021 - Xefe Forsa Defeza Hosi Nasaun 12 halo deklarasaun konjunta ida hodi kondena aktu violentu ne’ebé militár Myanmar halo durante hamosu Golpe iha nasaun refere, no husu atu militár Myanmar hapara ona violénsia ne’e.

Xefe Forsa Defeza Hosi Nasaun 12 ne’ebé halo deklarasaun konjunta ne’e mak hanesan, Austrália, Canadá, Alemaña, Grésia, Itália, Japaun, Reinu Dinamarka, Reinu Olanda, Nova Zelándia, Repúblika Korea, Reinu Unidu no Estadus Unidus Amérika (EUA).

“Hanesan Xefe Defeza, ami kondena uzu forsa letál hosi militár Myanmar no sira-nia forsa seguransa seluk hasoru povu dezarmadu sira. […] Ami husu Forsa Militár Myanmar atu hapara violénsia no servisu atu restaura respeitu no kredibilidade hosi povu Myanmar ne’ebé lakon tiha ona liuhosi sira-nia asaun,” hateten iha deklarasaun konjunta ne’ebé Embaixada EUA divulga ohin (29/3).

Iha deklarasaun konjunta ne’e mós hateten, militár profisionál sempre kumpri padraun konduta internasionál nian no iha responsabilidade atu proteje, la’os prejudika povu ne’ebé militár serví.

Enkuantu BBC Indonézia haktuir iha domingu (28/3) ne’e katak, militár Myanmar nia aktu violentu ne’e rezulta ona vítima mate hamutuk 400 resin inklui mós labarik.

Fonte: Mídia Embaixada Amerika iha TL

Notísia Hotu-Hotu >