Same: Ai Hún Ida Tohar Hanehan Ema Na’in-2 Mate Iha Fatin No Na’in-1 Kanek

Manufahi, 01 Abril 2021: Ai-samtuku hún boot ida tohar no hanehan mane na’in-2 iha kareta laran to’o mate iha fatin no feto na’in-1 kanek. Dezaste naturál ne’e akontese ohin (01/4) dadeer-saan iha área Ermete suku Letefoho, postu-administrativu Same, Manufahi, kauza hosi udan no anin boot.

Kareta ne’e nia ajudante ho naran Serafin Mendonça hateten, vítima ne’ebé mate ne’e mak kareta nia kondutór ho naran Emilio da Silva no nia alin ho naran Izidoro da Costa, sira na’in-2 mak túr iha kareta ho marka kery sapa matríkula 37939 ne’e nia oin.

Ajudante ne’e haktuir, nia ho feto ida túr iha kareta nia kotuk tanba ne’e ai-hún ne’ebé tohar nia sanak mak baku kona tiha feto ne’e hodi halo nia kanek.

Enkuantu kareta refere nia destinasaun mak hosi suku Daisua, Same, atu fila ba Likbau-ulu, Ainaru, maibé iha tuku 07:00 dadeer derepente hasoru tiha asidente ne’e iha área Ermete.

Parte kompetente sira halo kedas evakuasaun ba vítima, no ko’a mós ai-samtuku ne’ebé tohar.

Fonte: Diáriu "Roman ba Sosiedade" Manufahi

Notísia Hotu-Hotu >