Covid-19: Ohin Rejista Kazu Foun 2 Iha Ataúru, Totál Kazu Foun Iha Dili Hamutuk 34

Dili, 02 Abril 2021 – Liuhosi komunikadu imprensa, Sentru Integradu Jestaun Krize (SIJK) informa katak rejista tán kazu Covid-19 foun hamutuk na’in-34 iha munisípiu Dili, kompostu hosi mane na’in-19 no feto na’in-15, no hosi kazu 34 ne’e na’in-2 deteta iha Ataúru.

SIJK esplika, pasiente Covid-19 foun 2 iha Ataúru ne’e halo viajen hosi Dili iha 31 Marsu. Iha Dili sira hela iha Bidau Santana, no ekipa saúde buka tuir hela sira-nia kontaktu besik iha Dili no mós iha Ataúru.

Dili iha tán cluster foun rua mak Ataúru no aldeia Rai-Na’in, suku Bairu-Pité, nune’e totál iha cluster 50 mak rejista ona no cluster sira ne’e hatudu nafatin atividade hada’et Covid-19.

Iha mós pasiente rekuperadu foun na’in-24 ne’ebé SIJK relata ohin liuhosi komunikadu imprensa refere, nune’e totál jerál pasiente ne’ebé baixa hela iha Timor-Leste sa’e ba na’in-461.

Fonte: Timor News

Notísia Hotu-Hotu >