Governu Klarifika, Labele Tama No Sai Hosi Dili Tanba Serka Sanitária Renova Tán Ona

Dili, 02 Abril 2021 – Governu liuhosi Sekretaria Estadu ba Komunikasaun Sosiál (SEKOMS) klarifika ba públiku katak Governu renova ona Serka Sanitária no konfinamentu iha munisípiu Dili to’o 17 Abril 2021, tanba ne’e komunidade sira labele sai hosi munisípiu Dili, no labele tama mós hosi munisípiu seluk mai Dili.

Liuhosi SEKOMS nia klarifikasaun, husu nafatin atu komunidade sira kumpri regra sira hodi prevene no kombate Covid-19.

“Ema ida-idak tenke iha responsabilidade sívika atu kumpri regra sira ne’ebé Governu deside ona hodi kontribui ba nasaun saudável no mós atu labele virus ne’e da’et iha populasaun nia leet,” haktuir iha SEKOMS nia klarifikasaun divulgadu ohin (02/4).

Tuir rezolusaun hosi Governu kona-ba Serka Sanitária ne’ebé foin renova ne’e katak, sidadaun sira labele halo sirkulasaun “exetu iha kazu sira ne’ebé ho fundamentu forte tanba razaun seguransa públika, saúde públika, asisténsia umanitária no ba interese públiku nian”.

Fonte: Mídia Secretário de Estado Para a Comunicação Social (SECOMS)

Notísia Hotu-Hotu >