Governu Sei Fasilita Estudante Atu Fila Ba Munisípiu No Sei Asegura Mós Transporte

Dili, 03 Abril 2021 – Governu sei fasilita estudante sira ne’ebé iha nesesidade no hakarak fila ba ida-idak nia munisípiu, no Governu mós sei asegura transporte atu tula sira ba munisípiu.

Maibé molok atu ba munisípiu, estudante sira tenke hetan uluk teste swab Covid-19 iha ida-idak nia instituisaun Ensinu Superiór.

Asuntu hirak ne’e deside liuhosi reuniaun ne’ebé Ministru Ensinu Superiór, Siénsia no Kultura (MESSK) Longuinhos dos Santos, realiza ohin (03/4) ho Reitór sira hosi Ensinu Superiór públiku no privadu sira iha edifísiu MESSK, Dili, hodi diskute kona-ba medida atu fó apoiu ba estudante sira ne’ebé hakarak fila ba sira-nia munisípiu.

Parte hosi Ensinu Superiór sira afirma katak prontu atu kolabora ho Governu, liuliu identifika naran hosi estudante sira ne’ebé iha nesesidade no hakarak fila ba sira-nia munisípiu ho data limite to’o 09 Abril 2021.

Desizaun hirak ne’e Governu diskute no deside tanba estudante barak mak hakarak fila ba sira-nia munisípiu ho razaun Governu nia implementasaun Serka Sanitária iha munisípiu Dili ne’e difikulta sira atu hetan nesesidade balu.

Fonte: Mídia Ministério Ensino Superior Ciência e Cultura (MESCC)

Notísia Hotu-Hotu >