Udan Boot Rezulta Mota Lori Tiha Komunidade Balu Nia Uma Iha Fomentu II

Dili, 04 Abril 2021 – Udan boot ne’ebé akontese iha munisípiu Dili dezde hori-kalan to’o oras ne’e, rezulta mota ho korente maka’as hodi lori tiha komunidade balu sira-nia uma ne’ebé harii ho kaleen no balu harii tomak ho batako iha mota laran, iha aldeia Fomentu II, suku Komoro, munisípiu Dili.

Enkuantu vítima sira evakua tiha ona hosi fatin akontesimentu ba fali fatin seluk hodi asegura sira-nia vida hosi dezastre naturál refere.

“Komunidade sira-nia hela-fatin mota sobu hotu […] Governu presiza haree ida ne’e,” Americo Gomes nu’udar komunidade ida iha Fomentu II informa ba Timor News ohin (04/4).

Udan boot ne’ebé akontese dezde hori-kalan ne’e hamonu mós ‘bronjon’ ne’ebé Governu konstrui hodi satan mota iha Fomentu II.

Iha mós komunidade balu ne’ebé informa katak, sira buka moris liuhosi peneira rai-henek iha mota Komoro maibé mota lori hotu sira-nia rai-henek ne’ebé ema seidauk sosa no husik hela iha mota laran.

Fonte: Timor News

Notísia Hotu-Hotu >