Dili, 14 Dezembru 2020 – Prezidente Interina Asosiasaun Emprezariál Feto Timor-Leste (sigla portugés AEMTL) Shechah Sagran informa ohin (14/12) iha nia knaar-fatin Akait, Dili, katak AEMTL iha planu atu tau tán komboiu sein trilla (trackless train) iha munisípiu sira atu turista iha munisípiu sira mós bele halo viajen ho komboiu sein trilla ne’e.
Maibé, Tuir Shechah, atu implementa planu ida ne'e, AEMTL sei observa no estuda lai situasaun hosi komboiu sein trilla ne’ebé oras ne’e hala’o hela operasaun iha Dili.
“Munisípiu sira ne’e mós tenke survey uluk lai hodi haree sira-nia estrada ne’e serve ka lae. La’os fatin hotu-hotu serve,” Shechah akresenta tán.
Molok ne’e, AEMTL lansa uluk ona komboiu sein trilla ida iha 18 Novembru liubá, hodi fasilita turista sira atu vizita fatin turizmu iha kapitál Dili, ne’ebé to’o oras ne’e komboiu refere halo nafatin operasaun.
Fonte: Timor News