Dili, 21 Dezembru 2020 –Vendedór tais Timór iha Kolmera sira-nia rendimentu tún maka’as durante Pandemia Covid-19 tanba sira-nia tais ne’e maioria sosa hosi turista sira ne’ebé mai hosi rai liur. Lia hirak ne’e haktuir hosi vendedór Tais Timór, Afonso Magalhães, ba Jornalista Timor News nian ohin (21/12) iha Kolmera, Dili.

Afonso dehan, molok Covid-19 mosu, nia hetan rendimentu kada loron liu dólar limanulu ($50) hosi fa’an Tais Timór. Maibé, durante pandemia Covid-19 Afonso hetan de’it dólar amerikanu sanulu ($10) ka menus hosi ne’e kada loron.

“Durante (virus) Corona tama ne’e ema ladún hola no ami hetan (osan) natón ba hán no hemu de’it. Só malae iha mak sira sosa maibé agora malae la mai ne’e,” Afonso salienta.

Tanba to’o oras ne’e pandemia Covid-19 seidauk lakon, Afonso ne’ebé mai hosi postu-administrativu Atsabe, munisípiu Ermera, dehan katak nia pasénsia hodi hein de’it maibé wainhira situasaun laiha nafatin mudansa, entaun nia sei fila ba Atsabe hodi hala’o hikas atividade agríkola atu sustenta nia uma-laran ho oan hamutuk na’in neen, tanba sira sobrevive ho de’it fa’an tais no halo to’os.