Dili, 13 Jullu 2021 – Ahi hán fatin izolamentu Covid-19 ida iha ospitál al-Hussein, Nasiriya, Irake, iha segunda (12/7) kalan oras Irake nian hodi hamate ema hamutuk na’in-92 no hakanek na’in-100 resin, haktuir CNN ohin (13/7).
Polísia informa katak inséndiu iha ospitál al-Hussein ne’e hahú akontese wainhira faíska hosi fiu ne’ebé aat da’et ba tanke oksijéniu hodi kauza explozaun.
Parte investigadór sira hasai karta mandadu kapturasaun ba ema hamutuk na’in-13 inklui Xefe saúde provínsia Nasiriya, Saddam Sahib al-Taweel.
Primeiru-Ministru Irake Mustafa al-Kadhimi hateten, “inséndiu refere hanesan kanek ida ne’ebé kle’an iha ema Irake hotu-hotu sira-nia laran”.
Ida ne’e nu’udar inséndiu ospitál daruak iha Irake iha fulan tolu nia laran. Iha fulan Abril, inséndiu akontese iha ospitál ida iha Baghdad no hamate ema liu 80.
Fonte: CNN International