Dili, 29 Jullu 2021 – Akontese inséndiu ka ahi hán komunidade nia uma 400 resin iha merkadu Komoro, aldeia 03, Fatuhada, Dili, ohin (29/7) madrugrada.

“Neste momentu tékniku sira no xefe aldeia, xefe suku, rekolla hela dadus, la’o hela, maibé provizóriu iha ita-nia estimasaun por-volta-de [vítima] uma-kain 400 resin, bele to’o 500, bele to’o ema rihun ida resin hanesan ne’e,” Vise Ministra Solidariedade Sosiál no Inkluzaun (MSSI) Signi Chandrawati informa ba jornalista sira hafoin observa tiha inséndiu ne’e.

Tuir informasaun ne’ebé vítima sira hato’o katak, sira lakon sira-nia sasán tomak iha uma-laran, lakon sasán negósiu nian no balu lakon animál no transporte.

Signi akresenta, parte Governu observa no prepara hela kondisaun no apoiu emerjénsia ba vítima sira provizoriamente.

Vítima balu haktuir katak, inséndiu ne’e akontese tanba iha ema balu ho moras mentál ma sunu uluk hodi hada’et ba uma seluk.