Ainaru, 07 Agostu 2021 – Ahi hán merkadu iha postu-administrativu Maubise, munisípiu Ainaru, ohin (07/8) dadeer-saan besik tuku 11:00 no rezulta uma privadu haat no uma merkadu nian ida ho kuartu sanulu ne’ebé uza hodi fa’an sasán hetan estragus totál.
Rádiu Komunidade (RAKOM) Maubise pasa informasaun ba Timor News via whatsapp dehan katak, “akontesimentu ne’e la rezulta ema ruma mate no kanek, maibé sasán uma laran ho sasán ne’ebé mak vítima sira uza hodi buka moris iha merkadu ahi hán hotu”.
RAKOM Maubise akresenta, komunidade sira mak rega mate fali ahi tanba ekipa bombeiru hosi munisípiu Aileu ho Ainaru to’o tarde iha fatin akontesimentu. Oras ne’e vítima sira ba hela provizóriu iha viziñu sira-nia uma.
To’o notísia ne’e publika, Timor News seidauk hetan informasaun ruma kona-ba motivu hosi inséndiu ne’ebé akontese iha merkadu Maubise ne’e, maibé Polísia kontinua investiga.
Fonte: Timor News