Ainaru, 21 Marsu 2022 – Vítima Prefácio da Costa Coelho, informa katak, ahi hán mutuk tiha sira-nia uma ho dapur iha aldeia Ailora, suku Foho Ailiku, postu-administrativu Hatu-udu, munisípiu Ainaru, ohin (21/3) iha tuku 12:30 otl.
"Ami supila hela ai iha uma boot ida foin halo ne’e hateke sa’e mai uma ida ami hela ne’e ahi hán de’it ona la konsege salva sasán uma laran ahi hán hotu ami konsege foti de’it mak sasán lulik uma nian. Uma hodi hela ho dapur ahi hán hotu," informa Vitima Prefácio da Costa Coelho ba jornalista Timor News ohin ( 21/03) via telefone.
Prefácio rekomenda ba Governu sé bele tau netik matan ba tanba uma ne’ebé sira hela ahi hán hotu ona.
"Ida ne’e ha’u hakarak rekomenda ba Governu, tanba ida ne’e ba dala tolu ona primeiru iha 2019 ne’e ahi hán hotu, no foin lalais iha 14 ne’e ahi hán iha kalan viziñu sira mai konsege salva, ida ohin ne’e ahi hán hotu totál hela de’it isin lolon ho sasán uma-lulik, ne’ebé ha’u husu ba Governu sé bele tau-matan netik ba tanba uma mós hotu ona ne’e ha’u atu ba hela loos iha ne’ebé,” Prefacio dehan.
Nia dehan, hosi parte Bombeiru mak ba to’o iha fatin akontesimentu hodi haree no rega ai balu ne’ebé ahi hán maibé la konsege atu salva uma ne’e.
Fonte: Timor News