Dili, 18 Janeiru 2021 – Inspetór Jerál Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Ernesto Monteiro, informa katak AIFAESA sei halo kontrolu hodi haruka negosiante sira tenke hasa’e tabaku nia folin no labele kontinua fa’an tabaku ho folik ki’ik.
Inspetór Jerál AIFAESA hato’o asuntu ne’e ba jornalista Timor News, ohin (18/01) iha nia knaar-fatin Dili, no nia akresenta katak negosiante ne’ebé kontinua fa’an tabaku ho folin ki’ik AIFAESA sei haruka hasa’e nia folin tanba polítika hasa’e tabaku nia folin ne’e ho objetivu atu hamenus konsumidór tabaku iha Timor-Leste hodi prevene ema hosi moras balu.
“La sala tabaku ne’e sira hasa’e duni ninia taxa kuaze 50%, nune’e tabaku ne’ebé tama mai sira tenke hasa’e duni ninia folin para bele limita ema atu konsumu tabaku. […] Aban-bainrua ami hosi AIFAESA sei halo kordenasaun ho ministériu relevante sira hodi halo inspesaun, sé mak la kumpri, fa’an tabaku sei ho presu ne’ebé ki’ik katak sira fasilita (ema atu konsumu), ami sei halo kordenasaun hodi kontrola ida ne’e no haruka sira hasa’e hotu folin […] Presu sei ki’ik hela haruka tenke hasa’e tiha,” Ernesto Monteiro informa.
Nia hato’o mós mensajen ba foinsa’e no estudante sira atu labele atrapalla ho tabaku nia folin, maibé di’ak liu para ona fuma tanba sei fó impaktu negativu ba sira liuliu estraga osan no saúde.
Fonte: Timor News