Dili, 07 Outubru 2021 – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) liuhosi ninia Inspetór Jerál, Ernesto Monteiro, husu ba vendedór sira ne’ebé fa’an na’an fresku katak tenke define ninia presu ka folin hanesan ka ho uniforme iha teritóriu Timor-Leste.
“Atu fa’an iha Komoro ka iha Bekora ka iha Baukau ka Suai, iha ne’ebé de’it, pelu menus imi-nia presu ba na’an sira ne’e tenke hanesan, nune’e ita bele dehan katak kompetisaun iha merkadu ne’ebé di’ak,” Inspetór Jerál ne’e informa ba jornalista Timor News, ohin (07/10), iha ninia knaar-fatin, Matadouru, Dili.
Ernesto dehan katak Estadu la determina presu loloos ba na’an fresku sira tanba Timor-Leste aplika merkadu livre ne’ebé signifika katak presu determina iha merkadu entre ema ne’ebé sosa no ema ne’ebé fa’an.
“Presu ne’e determina hosi merkadu, entre ida ne’ebé sosa no fa’an. Estadu la tau presu justu ba na’an iha ne’ebá. Estadu uza merkadu livre, ho nune’e, loloos ne’e kompeténsia komérsiu ninian. Maibé ita mós utiliza merkadu livre, livre ne’e signifika katak presu ne’e merkadu mak determina, entre ida ne’ebé sosa ho ida ne’ebé fa’an mak determina […]. Tanba ne’e ha’u husu ba sira fa’an na’an sira ne’e pelu menus imi-nia presu sira ne’e tenke uniforme ho kolega sira seluk,” Ernesto esplika.
Nia mós dehan katak vendedór sira iha obrigasaun atu fa’an na’an ne’ebé ho kualidade no kuantidade di’ak ba konsumidór sira.
“Imi iha obrigasaun atu fó duni kualidade ne’ebé di’ak, kuantidade ne’ebé di’ak, ba ita-nia konsumidór sira ne’e, atu nune’e ita-nia konsumidór sira mós bele utiliza ka hán na’an ne’e tuir duni sira-nia kabun,” Ernesto dehan.
Nia ezije tán ba vendedór sira atu mantéin matadouru ka fatin oho animál sira hodi fa’an ne’e ho moos no evita ‘dois’ ne’ebé fó impaktu la di’ak.
Oras ne’e daudauk vendedór balu fa’an na’an fresku ho folin ne’ebé diferente mak hosi $7 to’o $8 resin ba na’an isin sira, no hosi $2.50 to’o $3 resin ba na’an ruin sira.
Fonte: Timor News