Korea Norte, 09 Agostu 2021 – Akontese udan boot iha Korea Norte iha semana kotuk to’o fín semana ne’e, rezulta inundasaun iha rejiaun balu hodi estraga uma hamutuk 1.000 resin no halo populasaun 5.000 resin mak evakua tiha ba fatin seluk, haktuir BBC News nia divulgasaun ohin (09/8).
Inundasaun ne’e estraga mós to’os ne’ebé nakonu ho ai-hán no infraestrutura lubuk ida hanesan estrada no ponte.
“Líder Supremu Korea Norte Kim Jong-un haruka tiha ona militár sira atu tún direita hodi ajuda populasaun ka vítima iha rejiaun sira ne’ebé inundasaun akontese ba,” BBC News informa.
Kim Jong-un preokupa tebes tanba iha Korea Norte oras ne’e menus ai-hán no hasoru hela pandemia Covid-19, depois inundasaun mosu tán hodi estraga buat barak.
Ajénsia Meteorolojia Korea Norte nian halo prediksaun katak udan boot ne’e sei akontese iha nasaun refere to’o 10 Agostu.
Fonte: BBC News