Dili, 15 Juñu 2021 – Ministru Justisa (MJ) Manuel Cárceres da Costa simu iha audiénsia ohin (15/6) Brigadeiru Jenerál João Miranda ‘Aluc Descartes’ iha edifísiu Ministériu Justisa, Dili, ho objetivu hodi ko’alia kona-ba pedidu atribuisaun terrenu ka rai ba konstrusaun uma ba veteranu sira iha munisípiu Lautén.
“Nune’e, Ministru Manuel husu ba parte veteranu sira atu bele submete lista veteranu hirak ne’ebé atu sai nu’udar benefisiáriu ba uma ne’ebé sei harii iha terenu ne’ebé sei atribui hosi Governu ba veteranu sira,” temi iha divulgasaun ofisiál hosi Gabinete MJ ohin (15/6).
Enkuantu iha tinan kotuk Prezidente Repúblika Francisco Guterres Lú Olo rasik defende no husu ba Governu atu harii uma ba veteranu sira tanba to’o oras ne’e veteranu sira seidauk iha hela-fatin ne’ebé dignu.
“Sira-nia uma seidauk iha duni no tenke dignifika ba veteranu sira,” dehan Lú Olo, tuir informasaun ne’ebé Timor News divulga iha tinan kotuk.
Fonte: Mídia Ministério da Justiça (MJ)