Dili, 11 Janeiru 2021 – Amaro da Cunha Soares nu’udar labarik minoridade ida ho idade 10, haktuir katak nia fa’an haas loro-loron dezde tinan 2019 to’o oras ne’e, hodi buka osan no ajuda nia inan-aman atu sosa foos hodi sustenta sira-nia uma-laran.

Amaro hateten, kada loron wainhira ema sosa hotu kedas haas ne’ebé nia fa’an entaun nia sei hetan $10, no osan ne’e la’os hodi ajuda sosa de’it foos maibé hodi sosa mós nia sasán ne’ebé uza ba eskola nian hanesan kadernu no lapizeira.

“Ha’u fa’an haas hodi la’o ba Largu no ba tasi-ibun sira tanba ta’uk la folin,” dehan Amaro ohin (11/01) ba jornalista Timor News, iha resintu Muzéu Rejisténsia, Dili.

Amaro ne’ebé mai hosi Laklubar, munisípiu Manatutu ne’e haktuir tán, nia nafatin ativu iha eskola, maibé wainhira oras aprendijazen iha eskola remata no fila ona ba uma mak nia hala’o atividade negósiu fa’an haas ne’e.

Amaro iha maun-alin hamutuk na’in haat (4) ne’ebé minoridade hotu, nia inan mós nu’udar negosiante ida ne’ebé fa’an dose loro-loron no nia aman badaen ida.