Manufahi, 03 Outubru 2023 - Autoridade Munisípiu Manufahi (AMM) kompostu hosi Administradór Munisípiu Manufahi, Arantes Isacc Sarmento, Diretór Agrikultura Munisípiu Manufahi, Aurélio dos Santos Marques, Administradór Postu Adminístrativu Alas, Franco Duarte da Costa, inklui grupu agrikultór sira iha Tersa (03/10) ne'e, kolleta hare iha natar ektare 100 iha suku Umaberloik, Postu administrativu Alas, munisípiu Manufahi.

Iha serimónia kolleta ne'e, Koordenadór Grupu Agrikultura Hadomi Wesusu Umaberloik, Mateus Gonçalves, agradese ba Ministériu Agrikultura Pekuária Peska no Floresta (MAPPF) liuhosi implementa programa adubu orgániku nasa (POC NASA, sigla indonézia) hodi ajuda ona sira bele hasa'e produsaun hare no hadi'ak sira-nia rendimentu ekonómia, maibé difikuldade ne'ebé sira hasoru maka tinan ne'e sira halo natar oituan de'it, tanba problema irrigasaun la iha, tratór, vivieru hare oan, pesti ataka no seluk tan. Hatán ba preokupasaun hirak ne'e, Diretór Agrikultura Manufahi, Aurélio dos Santos Marques, hateten katak MAPPF sei sosa tratór boot foun hamutuk unidade 10, sei haruka ba iha munisípiu Manufahi sei konsentra iha sentru mekanizasaun agrikultura Betano no Fatuberliu, hodi apoia ba programa POC NASA tuir tarjetu natar ektare 200 ne'ebé sei implementa iha tinan oin.