Bobonaru, 01 Outubru 2023 - Ministru Interiór (MI), Francisco da Costa Guterres, kompromete katak governu ba dasia liuhosi ministériu inteirór sei tau prioridade ba iha Unidade Polísia Fronteira (UPF) iha programa tinan lima ne'e nian, liuliu hadi'ak infraestrutura, kapasita membru sira hodi aumenta rekursu umanu, no seluseluk tan nune’e bele moderniza unidade polísia refere hodi hala'o sira-nia servisu ho di'ak liután iha liña fronteira. 

“Guvernu iha obrigasaun kria kondisaun ba UPF tanba ita sei hasoru eventu importante ida maka Timor-Leste sei tama ba Nasaun Membru Asosiasaun Sudeste Aziátiku (ASEAN, sigla inglés) iha tinan 2025. Ida ne’e ita-nia fronteira sei nakloke ba membru ASEAN hotu no imi iha papél halo prevensaun atu labele lori perigu ba nasaun. Segundu maka dezenvolvimentu ekonómiku hodi dada kadoras mai Timor-Leste no sei lori investimentu boot halo atividade ekonómiku iha rai laran. Entaun imi sei dezempeña servisu hodi bele hatene no haree ida ne’ebé mak mai ho di’ak no ladi’ak, nune'e hodi bele prevene labele lori problema ba rai ida ne’e”, hateten Francisco iha diskursu ba selebrasaun aniversáriu UPF nian ba dala-20 iha Sábadu (30/09) iha Nú-badak Batugade, Bobonaru.

Francisco mós apresia ho servisu hahú hosi komandante to'o membru UPF hotu nian ne'ebé mak durante ne'e hatudu tiha ona sira-nia dedikasaun, prestasaun servisu, disiplina no profisionál tebes, maske hasoru problema oinoin, tanba ne'e nia husu atu mantein hodi hadi'ak liután iha futuru. Membru UPF daudaun ne'e hamutuk na'in-330 no tuir planu komandu PNTL sei destaka tan na'in-34 hodi reforsa seguransa iha fronteira.