Dili, 10 Novembru 2023 - Liuhosi konferensia imprensa, Aliansa Nasionál ba Tribunál Internasionál (ANTI) ne’ebé kompostu hosi sosiedade sivíl, sobrevivente, vítima no família vítima sira masakre pasadu nian, kontra makaas eis-Jenerál Prabowo Subianto ne’ebé kandidata-an ona hodi konkore ba eleisaun prezidensiál Indonézia tinan 2024.

ANTI konsidera Prabowo nu’udar elementu xave ne’ebé dezeña eventu no akontesimentu trájiku, kruél, dezumanu, no krime ne’ebé kontra umanidade no violasaun direitu umanu organizadu no sistemátiku durante okupasaun Indonézia iha Timor-Leste. ANTI hateten katak durante dekáde rua liu ona vítima no família vítima sira iha Timor-Leste kontinua ezije no konsistente hein hela lialoos no justisa ba Timor-Leste hosi Indonezia no komunidade internasionál liuliu membru sira Konsellu Seguransa ONU nian.

ANTI deklara katak durante iha rejime Soeharto nia ukun, Prabowo Subianto envolve iha masakre no violasaun direitu umanus sira iha Timor-Leste hanesan masakre Kraras iha 1983, masakre Santa Cruz iha 1991, no mílisia iha 1999.

Nune’e, ANTI husu ba eleitór Indonézia atu lalika fó votus ba Prabowo, ba komunidade internasionál atu halo presaun no influénsia ba organizasaun direitu umanu iha Indonézia atu prevene kriminozu sira hetan oportunidade ba ukun, no atu kaer Prabowo hodi responsabiliza ba aktu violasaun direitu umanu sira ne’ebé nia komete iha pasadu.

Prabowo Subianto hamutuk ho Gibran Rakabumi Raka (oan mane bo'ot hosi atuál Prezidente Indonézia, Joko Widodo) ofisialmente aprezenta ona sira-nia kandidatura ba iha Komisaun Nasionál Eleisoens (KPU, sigla Indonézia) iha 25 Outubru 2023 hodi konkorre ba iha eleisaun prezidensiál Indonézia tinan 2024 ba periodu 2024-2029.