Dili, 21 Setembru 2021 – Ministru Ensinu Superiór, Siénsia no Kultura (MESSK) Longuinhos dos Santos hateten katak família apoiu ho domin mak sai nu’udar elementu fundamentál ba Graduadu sira-nia susesu iha perkursu akadémiku.
“Ha’u mós hakarak atu hato’o parabéns no felisitasaun ba imi-nia família sira, mak sempre akompaña imi hotu iha imi-nia vida akadémika nian, tanba ha’u fiar katak apoiu ne’ebé ho domin tomak hosi família mak sai nu’udar elementu fundamentál ba susesu hotu durante imi-nia perkursu akadémiku,” dehan Ministru Longuinhos wainhira nia halo diskursu iha serimónia Graduasaun ba dala-XXIV ne’ebé Universidade Nasionál Timor Lorosa’e realiza ohin (21/9) iha Hera, Dili, no partisipa hosi Graduadu hamutuk na’in-349.
Nia akresenta, ema hotu tenke konsiente katak estudante sira ida-idak ne’ebé hala’o estudu iha ensinu superiór sira ne’e sempre hetan apoiu maka’as hosi inan-aman sira iha kotuk.
“Ita hotu tenke iha konsiénsia katak hosi estudante ida-idak ne’ebé frekuenta iha ita-nia instituisaun ensinu superiór sira, inan-aman sira sempre hela iha sira-nia kotuk tanba hakarak hetan mehi ida ba sira-nia oan sira-nia susesu,” dehan Longuinhos.
Nune’e, nia husu ba Graduadu sira atu realiza mehi sira ho susesu liután iha kareira profisionál hodi serví mós komunidade no nasaun.
Fonte: Mídia Ministério Ensino Superior Ciência e Cultura (MESCC)