RAEOA, 25 Outubru 2021 – Prezidente Autoridade RAEOA Arsenio Paixão Bano hateten katak bee-moos sai nu’udar ninia prioridade daruak durante nia mandatu tanba povu iha RAEOA labele hamrook tán ba bee-moos.
Arsenio Bano hateten asuntu ne’e ohin (25/10) wainhira nia halo inaugurasaun ba projetu perfurasaun bee-moos iha aldeia Noafafo, suku Cunha, Pante-Makassar, RAEOA, ba benefisiáriu uma-kain hamutuk 187 ho totál populasaun hamutuk 850.
“Hahú ha’u-nia mandatu programa prioridade primeiru mak Covid-19, prioridade segundu mak bee-moos, tanba povu ida ne'e labele hamrook tán no ohin ha’u kontente tanba haree komunidade sira no labarik barak (estudante sira) hahú ohin ba oin atu ba eskola la susar ona ba bee-mos,” Arsenio dehan iha nia diskursu.
Arsenio akresenta katak, Oekusi oan tenke kontente tanba “laiha munisípiu ida ne'ebé mak tinan ida de’it halo perfurasaun bee-moos hamutuk LOT# 20, maibé úniku Oekusi de’it”.
Fonte: ZEESM Timor-Leste