Dili, 07 Outubru 2022 - Prezidente Repúblika, José Ramos Horta no Enkaregadu Negósiu Embaixada Estadu Unidus Amérika (EUA) iha Timor-Leste, Tom Daley, sesta-feira ne’e, entrega prémiu ba asossiasaun no negósiu turizmu 16 ne’ebé sai kampiaun turizmu. Atribuisaun prémiu anuál Turizmu Ba Ema Hotu ne’ebé realiza iha rezidénsia Embaixadór EUA iha Dili, entegra iha selebrasaun Loron Mundiál Turizmu tinan 2022.

Ajénsia Estadus Unidus ba Dezenvolvimentu Internasionál (USAID), liuhosi Projetu Turizmu ba Ema Hotu, organiza eventu ida-ne'e atu rekoñese asosiasaun, negósiu no individu sira ne'ebé kontribui maka'as ba indústria turizmu iha Timor-Leste, liuhosi atendimentu ba visitór sira tuir avaliasaun ba empreza turístika iha tinan kotuk. 

USAID-nia Projetu Turizmu ba Ema Hotu selesiona manán na’in ba prémiu kampiaun turizmu liuhosi sondajen públiku online, hodi loke ba Timoroan no ema sira ne'ebé hela iha rai-li'ur nee'ebé vizita ona nasaun ne'e. Painel internal ida hosi Projetu USAID nian Turizmu Ba Ema Hotu hili manán-na’in sira bazeia ba komentáriu ne’ebé fo sai iha kestionáriu online no númeru hosi nomeasaun ne’ebé kandidatu ida-idak simu.

Empreza balun ne'ebé manán prémiu ne'e simu ona apoiu hosi USAID liuhosi ninia projetu Turizmu ba Ema Hotu, ho total fundu ho valór millaun $1.8. Prémiu ne'e rekoñese mós asosiasaun turizmu nian sira ne'ebé servisu atu garante envolvimentu komunitária no apoiu dezenvolvimentu no promosaun turizmu nian.

Asosiasaun sira ne’ebé simu prémiu mak hanesan, ATKOMA (ne’ebé reprezenta povu no indústria turizmu Atauro), ASTRABEKA (ne’ebé servisu iha área Foho Ramelau), AEMTL (Emprezáriu Feto Timor-Leste nian), ATR-TL (Asosiasaun Turizmu Reliziozu),  ATM-TL (Asosiasaun Turizmu Maritimu), Asosiasaun Hotel Nain Timor-Leste  (HOTL), Asosiasaun Operador Tour Timor (HOTTL).

Manán-na’in ba Prémiu Kampiaun Turizmu nian ne'e mak hanesan, Eko Resort Diak Liu (Barry's Place, Atauro), Hotel Diak Liu (Beachside Hotel, Dili), Restaurante ho presu diak liu - Hahan ho folin menus hosi $8 (Dilicious Timor, AHI MATAN).

Restaurante diak liu (Kafé Aroma), Operadór Tour iha Dili diak liu (Juventude ba Dezenvolvimentu Nasional), Operadór Nasional di’ak liu (Eco Discovery Timor-Leste), Kafé Timor-Leste di’ak liu (Ha-Ha Kafé), Antendimentu Individual di’ak liu ba vizitór sira (Luis Martins hosi Eco Discovery Timor-Leste).