Dili, 03 Dezembru 2021 - Diretór Asosiasaun Santalum, Adalberto Higino Belarmino de Araújo informa katak viveiru ai-oan ne’ebé mak asosiasaun ne’e agora daudauk iha, prontu oferese ba komunidade, inklui instituisaun Estadu sira ne’ebé mak iha interese atu halo plantasaun.
Adalberto esplika, Santalum sei fó de'it ai-oan sira ne’e hosi atus ida mai kraik ba komunidade no instituisaun Estadu sira ne’ebé mak presiza, maibé s karik liu hosi atus ida ba leten asosiasaun sei halo identifikasaun antes, hafoin bele oferese ba sira, tanba tuir Diretór ne’e katak iha grupu benefisiáriu balu mak uza fali komunidade nia naran atu benefísia sira-nia projetu.
“Sim ba komunidade ami fó ba sira bele to’o 100, kuandu liu hosi 100, ami tenke buka hatene, tanba balu, organizasaun balu, tantu asosiasaun, NGO balu, fundasaun balu, ou grupu benefisiáriu balu ke hetan benefísiu hosi ajénsia balu, maibé tamba sira lakohi atu kole entaun sira finje mai lori komunidade nia naran atu husu, tanba ida ne’e mak kuandu ai-oan atus ida mai kraik entaun ami foti fó de'it, la'ós ba komunidade de'it inklui ba instituisaun Governu PNTL, F-FDTL no mós ajénsia internasionál balu,” hateten Adalberto ba jornalista Timor News, ohin (02/12), iha nia knaar-fatin Kolmera, Dili.
Nia hatutan, ba grupu benefisiáriu hanesan fundasaun no organizasaun non-gormenamentál sira karik presiza ai-oan, Asosiasaun Santalum sei fa'an ba sira.
“Mais klaru katak fundasaun, asosiasaun, NGO ka grupu benefisiáriu balu ka grupu ne’ebé hetan keuntungan ami bele fa'an ba sira,”Adalberto akresenta.
Tuir estimativa hosi Diretór katak, kada tinan sira bele prodúz ai-oan to’o 80.000 resin, wainhira iha projetu rua ka tolu.
Viveiru ai-oan ne’ebé mak agora daudauk iha hela armajén Kolmera mak hanesan, ai-kakeu tasi, ai-kakeu foho, a- ná, ai-saria, ai-mahoni ai-kasi, ai-samtuku, inklui ai-fuan hanesan salak no sabraka.