Dili, 11 Novembru 2021 – Ministru Obras Públika (MOP) Salvador dos Reis Pires, no Embaixador no Embaixadór Austrália iha Timor-Leste, Peter Roberts, akompaña hosi Prezidente Bee Timor-Leste Empreza Públika (BTL., E.P), Carlos Peloi dos Reis, asina akordu subsidiáriu millaun 4$ dólar Austrália hosi Governu Austrália, hodi hadi’a sistema kanalizasaun bee-moos ne’ebé hetan estragus hosi kalamidade ne’ebé akontese iha 04 Abril liubá.

“Sistema bee rua ne’ebé hetan sofre maka’as mak bee-moos tohu meta, ida fali tán mak Lakoto Mutudare, entaun osan millaun $4 dólar Austrália ne’e BTL uza atu halo reparasaun,” MOP informa ba jornalista sira hafoin asina akordu subsidiáriu ne’e ohin (11/11) iha Novu Turizmu, Dili.

Enkuantu Embaixadór Peter Roberts afirma katak programa ne’e ho objetivu atu responde ba nesesidade urjente no emediata fó kontinuasaun ba sistema bee-moos iha Dili, no programa ida ne’e sei inklui servisu emerjénsia hanesan hadi’a lalais liña distribuisaun ne’ebé aat no instalasaun ba fonte bee atu nune’e uma-kain sira bele asesu ba bee-moos lalais, rekoperasaun iha tempu médiu nian, hamoos no dezenvolve liña distribuisaun foun hodi satan tempu udan tuir mai ne’e no rekuperasaun iha tempu naruk nian mak apoia BTL hodi dezenvolve planu transmisaun bee iha tempu naruk nian ba tinan 50 tuir mai ne’ebé iha estudu.

Prezidente BTL, Carlos Peloi, informa katak sistema kanalizasaun bee-moos hetan estragus iha kalamidade 04 Abril liubá ne’e difisil tebes no lori tempu barak mak bele hadi’a hodi normaliza fornesimentu bee-moos ba komunidade.