Dili, 07 Setembru 2021 – Prezidente Parlamentu Nasionál (PPN) Aniceto Guterres Lopes, akompaña hosi Vise PPN Luis Roberto da Silva no Deputadu Antonio da Conceição, partisipa iha V Konferénsia Mundiál ba PPN sira, ne’ebé realiza iha tersa (07/9) ne’e iha Repúblika Áustria.
V Konferénsia Mundiál ne’ebé partisipa hosi PPN hamutuk 110 hosi nasaun hamutuk 115 ne’e realiza hodi ko’alia kona-ba oinsá kombate Covid-19, rekuperasaun ekonómika, alterasaun klimátika no dezenvolvimentu sustentável.
PPN Aniceto iha intervensaun hateten, Timor-Leste kombate Covid-19 hanesan ho nasaun sira seluk, katak impoin konfinamentu ne’ebé kauza hosi pandemia, no ida ne’e afeta ba setór sosiál no ekonómika iha kontrasaun 7,8% iha 2020 ho aumentu uitoan 1,8% ba 2021, ho previzaun aumentu 0,5% iha 2021 ba 2,0% iha 2022.
Nia relata tán, atu enfrenta dezafiu hirak ne’e, Timor-Leste reforsa ona medida sira ekonómika, saúde públika no proteje família vulnerável sira no setór emprezariál liuhosi subsídiu insentivu. Aléin hosi ne’e, Governu aselera mós vasinasaun kontra Covid-19 no kuaze populasaun 27,8% mak simu ona vasina doze rua, enkuantu populasaun 52,5% simu ona vasina doze dahuluk.
PPN Timor-Leste mós relata dezastre naturál ne’ebé akontese iha Timor-Leste iha 04 Abríl liubá ne’ebé kauza estragus barak no halakon mós ema nia vida.
Konferénsia Mundiál refere organiza hosi Inter-Parliamentary Union (IPU) ho Parlamentu Áustria nian servisu hamutuk ho Nasaun Unidu. Tuir ajenda ne’ebé iha, Konferénsia Mundiál refere sei kontinua tán iha 08 Setembru 2021. Konferénsia ida ne’e hala’o tinan lima dala ida.
Fonte: Media Parlamento Nacional