Dili, 25 Novembru 2021 – Komandante Jerál Polísia Nasionál Timor-Leste (PNTL), Komisáriu Faustino da Costa, hateten katak hahú hosi 01 to’o 24 Novembru 2021 UPF kaptura ona ema hamutuk na’in-32 ne’ebé halo negósiu no tranzasaun ilegál ba sasán sira inklui fugetes iha fronteira entre Timor-Leste no Indonézia.
Nia hateten, sasán sira iha negósiu no tranzasaun ilegál ne’e maioria nesesidade bázika no agora ida domina liu mak fugetes ne’ebé iha relasaun ho festa Natál.
“Timoroan barak ke gosta nafatin hala’o atividade ilegál iha ne’ebá (área fronteira). […] Orientasaun ba Unidade Patrullamentu Fronteira (UPF), unidade destakadu no mós Komandu munisípiu, atu evita sasán hirak ne’e. Orientasaun ne’ebé Komandu (PNTL) fó mak sira tenke atua labele husik situasaun sira ne’e sai hanesan ne’e,” Komisáriu Faustino da Costa informa, ohin (25/11) hafoin hasoru malu ho Prezidente Repúblika Francisco Guterres Lú Olo, iha Palásiu Prezidensiál, Dili.
Nune’e, Komandante Jerál PNTL ne’e husu ba sidadaun hirak ne’ebé hakarak hala’o atividade negósiu atu tenke tuir dalan sira legál.
Fonte: Mídia Presidente da Repúblika (PR)