Dili, 10 Juñu 2021 – Komisaun Anti Korupsaun (sigla portugés CAC) rekomenda ba Ministériu Transporte no Komunikasaun (MTK) atu suspende provizoriamente operasaun ró-ahi Tranship II Gresik Indonesia ne’ebé MTK aluga atu hodi troka ró-ahi SUKSES no Berlin Nakroma ne’ebé avaria.

CAC hato’o rekomendasaun ne’e hafoin Komisáriu Adjuntu ba Asuntu Prevensaun no Sensibilizasaun Luis de Oliveira Sampaio ho nia ekipa prevensaun korupsaun deskobre tiha iregularidade balu iha prosesu aprovizionamentu ba ró-ahi Tranship II ne’e wainhira hala’o inspesaun iha semana kotuk.

“CAC estuda hela no kruza informasaun sira ne’e. Tanba prosesu sira la’o daudauk ne’e buat hotu sira halo tiha (lori tiha ró-ahi ne’e mai Timor halo tiha kontratu ho ró ne’e) depois mak foin halo prosesu selebra kontratu. Kontratu halo tiha ona mak foin orienta halo prosesu aprovizionamentu. Ida ne’e mak fatal liu,” dehan Luis Sampaio, haktuir informasaun ne’ebé divulga ofisiálmente hosi CAC ohin (10/6).

Komisáriu ne’e akresenta, rezultadu inspesaun hosi MTK ba ró-ahi ne’e totalmente kontráriu ho rezultadu inspesaun ne’ebé CAC iha.

“Entaun sira (MTK) koko ita! Mais ita nian ne’e kontráriu. Liuliu buat ida substánsia liu mak iha prosesu aprovizionamentu ne’e,” Sampaio dehan.

Ró-ahin Traship II ne’e, CAC haktuir katak nia óleo suli hela nune’e perigozu tebes ba pasajeiru sira-nia salvasaun, no iha mós buat balu ne’ebé aat hela no kesi de’it ho tali.