Dili, 23 Setembru 2021 – Empreza Pfizer afirma katak vasina ne’ebé sira prodúz hamutuk ho BioNTech hodi kontra Covid-19 ne’e seguru no efetivu atu aplika ba labarik sira ho idade tinan 5 to’o 11.
“Rezultadu hosi teste ne’ebé ami halo hatudu baze ne’ebé forte hodi halo pedidu lisensa atu aplika ami-nia vasina ne’e ba labarik ho idade tinan 5 to’o 11, no ami planeia atu halo pedidu ne’e ba Food and Drug Administration (FDA) no mós ajénsia seluk relasiona ho uzu emerjensiál,” Chief Executive Officer (CEO) Pfizer, Albert Bourla afirma, haktuir BBC News ohin (23/9).
Parte Pfizer esplika mós katak labarik sira ho idade tinan 5 to’o 11 ne’ebé simu vasina Pfizer iha teste klínika ne’e la hetan efeitu kolaterál ruma ne’ebé todan liu kompara ho efeitu kolaterál ne’ebé ema sira ho idade tinan 16 to’o 25 hetan.
Teste ne’e envolve labarik 2.268 ne’ebé sai nu’udar voluntáriu hodi simu vasina Pfizer doze rua ho mikrograma 10 ba kada doze.
Fonte: BBC News