Vikeke, 22 Novembru 2021 – Centro Nacional Chega! (CNC) hamutuk ho Asosiasaun Vítima 1974-1999, no autoridade lokál, família vítima inklui komunidade no estudante sira, komemora loron Masakre Gara-Ulu ne’ebé akontese iha suku Afaloikai, postu-administrativu Uatukarbau, munisípiu Vikeke, iha 22 Novembru 1978, liuhosi realiza semináriu ho tema ‘Armoniza Memória Pasadu Hodi Harii Hikas Dame Rohan Laek’.
Masakre ne’e akontese tanba militár Indonézia Batallaun 502 oho timoroan sira hamutuk na’in-13, na’in-6 hosi postu-administrativu Baguia, Lavatere no na’in-7 hosi postu-administrativu Uatukarbau, Afaloikai. Hafoin oho tiha, militár Indonézia lori sira na’in-13 ne’e ba soe tama ba Bee debu nia laran.
Iha komemorasaun ne’e, CNC liuhosi Divizaun Edukasaun no Formasaun (DEF) hala’o mós atividade Chega! Tour hodi lori estudante sira ba vizita fatin akontesimentu masakre Gara-Ulu no esplika ba estudante sira kona-ba lala’ok akontesimentu hodi sira bele hatene.
Iha vizita ne’e, familia vitima sira hamonu mata-ween tanba lakon familia ne’ebé sira hadomi tanba defende liafuan ukun rasik-an.
Fonte: Centro Nacional Chega!