Dili, 12 Setembru 2021 – Sentru Integradu Jestaun Krize (SIJK) relata totál kazu infetadu Covid-19 foun hosi teritóriu nasionál ohin (12/9) hamutuk ema na’in-133, pasiente rekuperadu iha na’in-168, no kazu mate iha na’in-5. Hosi infetadu foun 133 ne’e na’in-35 ka 26% mak simu ona vasina kontra Covid-19 doze rua ka kompletu, enkuantu na’in-11 ka 8% mak simu ona vasina doze dahuluk.
Númeru kazu 133 ne’e kompostu hosi 70 iha Dili, 22 iha RAEOA, 18 iha Lautén, 10 iha Baukau no 13 iha munisípiu seluk.
“Hosi totál kazu detetadu foun ohin, kazu 75 (56,5%) mak sintomátiku (hatudu sintoma),”SIJK esplika iha nia komunikadu imprensa ofisiál ohin nian hosi SIJK ne’ebé sita mós Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria Araújo.
Ho rezultadu ba loron ohin nian, oras ne’e Timor-Leste rejista kazu ativu hamutuk 3.105 no mate sa’e ona to’o na’in-95.
Fonte: Mídia Palácio das Cinzas