Dili, 02 Setembru 2021 – Sentru Integradu Jestaun Krize (SIJK) relata katak kazu infetadu Covid-19 foun ohin (02/9) iha ema na’in-269, no hosi totál refere iha ema na’in-73 ka 27% mak simu ona vasina kontra Covid-19 kompletu (doze rua), enkuantu hirak hosi kazu foun ne’e ne’ebé simu ona vasina doze dahuluk iha na’in-28 ka 10%.
SIJK mós relata kazu óbitu ka mate iha ema na’in-2, feto timoroan ida ho idade 36 no mane timoroan ida ho idade 60. Sira na’in-2 seidauk simu vasina kontra Covid-19.
“Hosi kazu detetadu foun (na’in-269) ohin, 73 (27%) simu ona vasina kompletu, 28 (10%) simu ona vasina doze dahuluk. [...] Óbitu ne’ebé relata ohin: 2,” SIJK relata liuhosi komunikadu imprensa ne’ebé Timor News asesu.
Totál kazu foun 269 ne’e kompostu hosi na’in-139 iha Dili, na’in-27 iha Ermera, na’in-22 iha Baukau, na’in-16 iha Bobonaru, na’in-14 iha Kovalima, na’in-12 iha Lautén, na’in-9 iha Vikeke, na’in-9 iha Manufahi, no na’in-21 iha munisípiu seluk.
“kazu 94 ka 35% (hosi totál 269 ne’e) mak sintomátiku (hatudu sintoma),” SIJK informa.
Iha mós pasiente rekuperadu na’in-262 ne’ebé SIJK relata ohin, nune’e kazu Covid-19 ativu iha Timor-Leste oras ne’e iha na’in-4.485, no totál óbitu iha Timor-Leste to’o oras ne’e rejista ona na’in-74.
Fonte: Mídia Palácio das Cinzas