Dili, 14 Maiu 2021 – Sentru Integradu Jestaun Krize (SIJK) relata ohin (14/5) katak deteta tán kazu pozitivu infetadu Covid-19 foun hamutuk na’in-239 ne’ebé inklui na’in-77 tán hosi prizaun Bekora, tuir komunikadu imprensa ne’ebé Timor News asesu.
Kazu foun 239 ne’e na’in-198 deteta iha munisípiu Dili no na’in-41 deteta iha munisípiu seluk, sira hotu ho sexu mane na’in-174 no feto na’in-65.
“Husi kazu 239 detetadu ohin, 77 hosi kadeia Bekora. Hamutuk hotu hosi hori-sehik mai ohin, iha kadeia Bekora deteta kazu pozitivu 220 hosi populasaun prizionál 557,” esplika iha komunikadu imprensa ne’e kona-ba kazu ne’ebé deteta iha prizaun ka kadeia Bekora.
Iha mós pasiente rekuperadu foun na’in-86 ne’ebé SIJK relata, nune’e totál númeru pasiente Covid-19 ne’ebé oras ne’e baixa hela iha Timor-Leste hamutuk na’in-1968.
Fonte: Mídia Palácio das Cinzas