Dili, 17 Agostu 2021 – Ministériu Saúde relata kazu óbitu ho Covid-19 hamutuk na’in-5 iha loron ohin (17/8) ne’ebé inklui bebé na’in-3 mate iha sira-nia inan nia knotak.
Sentru Integradu Jestaun Krize (SIJK) informa katak, hosi bebé na’in-3 ne’ebé mate ne’e na’in-1 nia inan ne’ebé ho idade 37 no isin-rua semana 40 ona mós la salva ka mate. Enkuantu hosi bebé na’in-2 seluk ne’e na’in-1 ho idade semana 28 no ida seluk ho idade semana 33 no sira na’in-2 ne’e nia inan iha kondisaun estável hotu maibé “ho diagnóstiku Covid-19”.
“Óbitu ne’ebé relata ohin, 17 Agostu 2021 (adultu 2, mate iha inan nia kanotak na’in-3), hamutuk 5,” SIJK relata liuhosi komunikadu imprensa ne’ebé Timor News asesu ohin.
SIJK esplika, kazu mate adultu na’in-2 rua ne’e mak mane na’in-1 ho idade tinan 41, no feto na’in-1 ne’ebé temi ona iha leten. Nune’e Timor-Leste to’o oras ne’e rejista ona kazu óbitu ho Covid-19 hamutuk na’in-38.
SIJK mós relata kazu pozitivu foun ohin hamutuk na’in-247 ne’ebé kompostu hosi na’in-192 iha Dili, na’in-24 iha Ermera, na’in-12 iha Bobonaru, na’in-12 iha RAEOA no na’in-7 iha munisípiu seluk.
Iha mós pasiente rekuperadu foun hamutuk na’in-37, nune’e kazu ativu iha Timor-Leste to’o oras ne’e iha na’in-2.349.
Fonte: Mídia Palácio das Cinzas