Dili, 26 Agostu 2021 – Ministériu Saúde (MS) liuhosi Sentru Integradu Jestaun Krize (SIJK) ohin (26/8) relata kazu óbitu ka mate ho Covid-19 ema na’in-4 no hosi na’in-4 ne’e mane na’in-1 mak simu tiha ona vasina kontra Covid-19 doze rua ka doze kompletu, enkuantu feto na’in-1 no mane na’in-2 seluk seidauk simu vasina.
“Óbitu ne’ebé relata ohin, 26 Agostu 2021/New Death: 4. Feto, idade tinan 65, timoroan, hela iha Dili, seidauk vasina [...]. Mane, idade 69, timoroan, hela iha Dili, simu ona vasina doze kompletu [...] matebian (ne'ebé simu ona vasina doze kompletu) iha mós istória stroke hemorájiku [...]. Mane, idade tinan 69, timoroan, hela iha Dili, seidauk simu vasina [...]. Mane idade tinan 23, hela iha Vikeke, seidauk simu vasina [...],” SIJK relata liuhosi komunikadu imprensa ne’ebé Timor News asesu ohin (26/8).
Ho ida ne’e mak to’o agora Timor-Leste rejista ona kazu óbitu Covid-19 ho totál hamutuk na’in-56.
SIJK mós informa kazu foun infetadu Covid-19 hamutuk ema na’in-307. Hosi totál ne’e na’in-243 deteta iha Dili, na’in-30 iha Baukau no na’in-34 iha munisípiu seluk.
Ohin rejista mós ema na’in-152 mak rekupera hikas ona, nune’e totál kazu ativu to’o oras ne’e iha ema na’in-4.203.
Fonte: Mídia Palácio das Cinzas