Europa, 11 Setembru 2021 – Jogadór ne’ebé koñesidu ho númeru uniforme 7 Cristiano Ronaldo hatama golu rua iha nia jogu dahuluk, ohin (11/9) iha estádiu Old Trafford, hamutuk ho klubu futeból Manchester United kontra Newcastle nu’udar jogu Premier League ho rezultadu score ikus 4-1.
Golu dahuluk ne’ebé jogadór ho nasionalidade Portugál ne’e hatama mak iha minutu 46’ hosi tempu adisionál iha jogu parte dahuluk, nune’e Manchester United lidera iha parte dahuluk ho score 1-0.
Tama ba parte daruak, Newscastle konsege muda score ba 1-1 liuhosi nia Jogadór Javier Manquillo ne’ebé hatama ba rede Manchester nian iha minutu 56’.
Ronaldo muda fali score ba 2-1 hafoin hatama tán ida iha minutu 62’. Manchester nia golu rua seluk tuir mai hatama hosi Bruno Fernandes iha minutu 80’ no Jesse Lingard iha minutu 91’, nune’e score ikus 4-1.
Ho ida ne’e, Manchester United lidera hela klasifikasaun provizóriu Premier League ho pontu 10, no tuir kedas mak Chelsea.
Fonte: Sky Sport