Dili, 11 Maiu 2021 – Ekipa Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), I.P hala’o inspesaun no fiskalizasaun ba fatin fa’an na’an ohin (11/5) iha merkadu Taibesi, no deteta katak dasin ne’ebé Operadór Ekonómiku utiliza hodi komersializa na’an ba konsumidór sira ne’e maioria la tuir padraun ne’ebé iha.
Tanba ne’e Inspetór sira hosi AIFAESA halo kedas apreensaun ba dasin hitu (7) hosi estabelesimentu sia (9) ne’ebé inspesionadu, no konvoka mós Operadór Ekonómiku rua (2) hodi hato’o justifikasaun ba Inspetór Responsável.
“AIFAESA halo apreensaun ba dasin sira ne’e la signifika atu sai na’in nfali ba dasin ne’e lae, maibé hodi bolu atensaun ba Operadór Ekonómiku katak wainhira utiliza dasin tenke tuir padraun ne’ebé iha, hadi’a buat ne’ebé la di’ak presiza hadi’a,” dehan Inspetór Jerál AIFAESA Ernesto Monteiro, iha nia knaar-fatin, Dili.
Nia dehan, AIFAESA nia papél mak halo kontrolu ba legalidade atividade ekonómika ne’ebé hala’o iha Timor-Leste, no halo kontrolu ba kuantidade no kualidade hodi garante no proteje konsumidór sira, atu konsumidór sira sosa na’an ho presu ne’ebé iha kuantidade no kilógrama favoresidu duni.
Fonte: AIFAESA, I.P