Baukau, 13 Agostu 2021- Leonel Belo hanesan defisiente fíziku ida hosi suku Makalaku, postu-administrativu Kelikai, munisipiu Baukau, informa katak, nia sente triste tanba hakotu estudu iha eskola sedu tebes no ohin loron haree nia maluk defisiente sira seluk hanesan nia bele asesu ba edukasaun no kampu traballu, maibé nia labele tanba ekonomia la sufisiente nune’e nia tenke hapara estudu iha klase sexto ano.

“Hakarak atu eskola fali maibé ekonomia laiha. Ha’u sente triste uitoan, haree kolega defisiente balu ba eskola, ba servisu, maibé ha’u iha uma  de’it,” haktuir Leonel ba jornalista Timor News, ohin (13/8), via telefone.

Leonel akresenta, nia rasik deside hapara estudu la’os tanba nia mak lakohi ona atu eskola, maibé inan-aman mak kbiit la to’o duni.

Leonel mós haktuir katak iha tinan 2020 nia fa’an pulsa maibé pandemia Covid-19 halo nia tenke hapara mós nia atividade negósiu ida ne’e.

Leonel ne’ebé nu’udar oan ba dahituk hosi maun-alin na’in-8 ne’e husu ba Governu atu identifika no tau-matan didi’ak ba ema ho defisiénsia sira iha Timor-Leste tanba balu loron-kalan túr de’it iha uma no balu iha estrada ninin.