Manufahi, 10 Fevereiru 2022 – Defisiente Pasqual da Costa ho idade tinan 62, moris iha aldeia Datina, suku Holarua, postu administrativu Same munisípiu Manufahi ho kondisaun moras mentál, iha Kinta-feira (10/02) ne’e hatete katak, loron-loron nia sempre husu foos kopu ida ba viziñu hodi halo sasoro sustenta nia moris loron tomak ida nian.

Pasqual hatete katak depois nia husu tiha foos kopu ida iha viziñu sira hodi halo sasoro, ho sente triste hodi hanoin ba loron aban nian tanba laiha ema ida ne'ebé nia bele tane liman ba.

“Karik loron ohin ha'u husu ona foos kopu ida iha viziñu sira, kalan ha'u tuur hanoin ba loron aban nian, atu tane liman tán fali ba se, sé no sé tán maka sei laran kmaan fó netik foos kopu ida ba ha'u,” halerik Pasqual.

Pasqual espresa katak nia sente moe wainhira tane liman beibeik ba nia viziñu sira tanba dala barak ona nia husu tulun hosi sira.

“Ha'u hanesan ema idade ona, ha'u sente moe hodi tane liman beibeik ba ha'u-nia viziñu sira, tanba dala wain ona ha'u tane liman beibeik ona, ha'u triste no matan-been turuk haree ba ha'u-nia kondisaun rasik”.