Dili, 20 Outubru 2021 - Julião dos Reis Mendonca ho naran bolu Zidane, idade tinan 21, nu’udar defisiente ida ne’ebé oras ne’e hakdasak de’it no moris ho sentimentu trauma wainhira halo interasaun ho sosiedade.
“Ami lori nia (Zidane) ba tratamentu ne’e doutór espesialista sira dehan nia trauma ka iha jiwa penakut,” Wilfrida Nahak nu’udar Zidane nia inan informa ba jornalista Timor News, ohin (20/10) iha hela-fatin Manleuana, Dili.
Wilfrida hateten katak seidauk iha parte Governu ruma mak tau-matan ka fó apoiu ruma.
Iha duni asosiasaun balu ne’ebé fó kadeira-roda ba Zidane atu uza maibé la adekuadu ho ninia kondisaun nune’e difikulta nia atu uza rasik hodi la’o.
Zidane iha maun-alin hamutuk na’in-6 maibé ida mate tiha ona, nune’e hela na’in-5 ne’ebé kompostu hosi mane na’in-2 mak Zidane ho nia alin mane ida no feto na’in-3.
Fonte: Timor News