Dili, 14 Jullu 2021 – Deputada sira iha Parlamentu Nasion’al hosi Grupu Feto Parlamentár Timor-Leste (sigla portugés GMPTL) kontinua fó konfiansa ba Deputada Lídia Norberta dos Santos Martins hodi lidera GMPTL ba períodu 2021-2023, haktuir Parlamentu Nasionál nia divulgasaun ofisiál ohin (14/7).
Iha Divulgasaun ofisiál ne’e temi, “konfiansa refere Deputada sira hosi membru GMPTL fó liuhosi eleisaun ho votu 13 ba Deputada Lídia no votu 12 ba kandidata Deputada seluk”.
Membru GMPTL deside avansa ho lista kandidata rua ba Prezidente GMPTL mak hanesan, lista A ne’ebé hetan votu 13 mak reprezenta kandidata Deputada Lídia Norberta dos Santos Martins nu’udar Prezidente ho nia Vise no Sekretária, no lista B ne’ebé hetan votu 12 mak reprezenta kandidata Deputada Isabel Maria B Freitas Ximenes nu’udar Prezidente ho nia Vise no Sekretária.
Enkuantu kandidata ba Vise Prezidente GMPTL iha lista A no B ne’e hanesan de’it mak Deputada Domingas dos Santos, nune’e mós Sekretária mak Deputada Elvina Sousa Carvalho.
Fonte: Media Parlamento Nacional