Manufahi, 11 Setembru 2023 – Xefe aldeia Selihasan, Saturnina da Silva, hateten katak iha loron 10 fulan Setembru tuku haat madrugada sira prende tiha karau timor ida nia ulun hosi kareta ne'ebé tula na'an karau timor ida ho rusa fuik rua iha baliza entre aldeia Selihasan ho feriksare, suku Betanu, postu administrativu Alas, munísipiu Manufahi. Karau refere tiru ho kilat hosi membru FALINTIL-Forsa Defeza Timor-Leste (F-FDTL) ne’ebé akompaña hosi matadalan ho naran inisiál RM no kareta na'in ho inisial MR.

Xefe aldeia Saturnina hato’o ba Diáriu Roman ba Sosiedade Manufahi iha Segunda (11/09) iha Selihasan, Betanu, katak sira simu informasaun hosi Bernardino Perreira ne'ebé toba hein hela ninia karau katak iha grupu ida ne'ebé tiru karau iha loron sia fulan Setembru oras tuku 12 kalan. Nune'e, hamutuk ho ofisiál polísia suku, sira ba kedas konsentra hodi hein kareta ne'ebé uza ba tiru karau iha kruzamentu área selihasaun ho feriksare postu Alas. Ikus mai, sira konsege para tiha kareta ne'ebé tula naan karau ho rusa fuik rua no prende tiha karau timor ida nia ulun iha oras tuku 04:20 madrugada hodi sai hanesan evidénsia.

Maske autoridade lokál prende karau ne'ebé sira tiru ne'e nia ulun, matadalan RM hateten katak karau refere ninian no la’os komunidade sira seluk nian. Tanba karau ne’e fuik ona, nia husu ajuda ba membru F-FDTL na’in rua iha postu Betano, priense formatu ida ba tiru karau nian, depois mak sira ba tiru mate tiha ninia karau. Maske nune'e, autoridade lokál sira iha Betanu kontinua koordena ho komunidade ne'ebé iha karau hodi lori kazu ne'e prosesa tuir dalan legál hodi hatene loloos faktu, tanba uza kilat hodi kasa animál fuik, inklui karau hakiak.