Dili, 22 Jullu 2021 – Governu provínsia Nusa Tenggara Timur (NTT), Indonézia, ba dahuluk anunsia ofisialmente kazu Covid-19 variante Delta katak deteta ema na’in-3 pozitivu infetadu variante Delta iha NTT.
“Bazeia ba rezultadu teste ne’ebé halo, iha espésime Covid-19 tolu iha NTT ne’ebé hatudu mutasaun no deklara katak nu’udar variante Delta,” dehan Xefe Laboratóriu Ospitál Prof. Dr. W. Z. Johanis Kupang, Hermi Indita Malewa, iha kuarta (21/7) ne’e, haktuir CNN Indonézia.
Hermi akresenta katak hosi pasiente na’in-3 ne’ebé infetadu variante Delta ne’e na’in-1 ho idade tinan 12.
NTT nu’udar Indonézia nia provínsia ne’ebé haketan rai ho Timor-Leste, tanba ne’e Prezidente Repúblika Timor-Leste Francisco Guterres Lú Olo hato’o nia preokupasaun wainhira hasoru malu ho Primeiru-Ministru Taur Matan Ruak, ohin (22/7) iha Palásiu Prezidensiál, Dili, relasiona ho variante Delta ne’ebé deteta ona iha NTT, nune’e nia husu parte Governu Timor-Leste atu tau-matan didi’ak ba fronteira hodi prevene transmisaun variante Delta tama Timor-Leste.
Fonte: CNN Indonesia