Dili, 11 Agostu 2021 – Diretór Diresaun Nasionál Transporte Terestre (DNTT) Natalino do Rosário hateten katak joven barak mak sa’e tiha mikrolete ho númeru 01 to’o 12 ne’ebé halo operasaun iha sidade Dili ne’e no lakohi selu wainhira tún ona iha fatin destinadu.
Diretór ne’e dehan, dala-barak DNTT mós simu lamentasaun hosi mikrolete nia na’in sira katak pasajeiru balu sa’e tiha sira-nia mikrolete no lakohi selu wainhira tún ona.
“Barak liu no dalaruma mikrolete nia na’in sira ne’e mai hato’o sira-nia lamentasaun sira ne’e. [...] Ita-nia komunidade sira ne’e liuliu barak mak joven sira ne’e, sa’e tiha ema-nia kareta depois kuandu tún ona lakohi selu ida. Ne’e barak akontese hanesan ne’e,” dehan Diretór DNTT ba jornalista Timor News ohin (11/8) iha nia knaar-fatin, Dili.
Tanba ne’e, nia husu ba komunidade liuliu ba joven sira katak sa’e mikrolete sira iha sidade Dili ne’e tenke selu wainhira tún ona iha fatin destinadu.
“Sira presiza ema selu para kareta aat karik ka mina (kombustível) laiha karik, sira presiza buat sira ne’e. (Kareta nia na’in) sira balu mai hato’o keixa iha ne’e katak (komunidade) sira sa’e tiha mikrolete, mai tún la’o liu tiha de’it lakohi selu ida. Ida ne’e la di’ak, tanba ne’e DNTT husu ita-nia populasaun hotu-hotu nia kompreensaun,” Natalino akresenta.
Fonte: Timor News